AccessBank-ın əsas inkişaf vektoru sadəcə bir bank kimi deyil, müştərilərinin maliyyə inkişafında etibarlı tərəfdaş kimi davamlı şəkildə böyüməkdir. Şirkətin fəaliyyəti dörd əsas prinsipə əsaslanır: şəffaflıq, müştəriyönümlülük, innovasiya və məsuliyyət. Bu strategiyanın effektivliyi artıq sübut olunub — 2010-cu ildə Standard & Poor’s agentliyi AccessBank-ı “Azərbaycanın ən şəffaf bankı” kimi tanımışdır.
AccessBank müasir və effektiv rəqəmsal həllərdən ibarət ekosistem qurmağa fokuslanaraq, Azərbaycan biznesinin və iqtisadiyyatının inkişafına töhfə verməyi qarşısına məqsəd qoyub. Xüsusilə, bank maliyyə inklüzivliyinin həyata keçirilməsinə (həssas qruplarda olan sahibkarların zəruri avadanlıqla təmin edilməsi), ölkədə maliyyə savadlılığının inkişafına və Access2Access layihəsi vasitəsilə qadın sahibkarlığının dəstəklənməsinə böyük diqqət yetirir. Təşəbbüskarlığı və peşəkarlığı sayəsində AccessBank bir sıra nüfuzlu mükafatlara layiq görülmüşdür, o cümlədən 2011, 2012, 2015, 2016 və 2020-ci illərdə “The Banker” nəşri bankı “Bank of the Year” (“İlin Bankı”) mükafatına layiq görmüşdür.
Bu səviyyədə keyfiyyətli xidmətlərin göstərilməsi müvafiq texniki dəstək tələb edir. Məhz bu səbəbdən AccessBank mühasibat uçotu, inventarizasiya və daxili əməliyyatların avtomatlaşdırılması üçün yeni proqram təminatını tətbiq etmək qərarına gəldi. Şirkət bu məqsədlə Microsoft Dynamics 365 Business Central həllini seçdi. Bu sistemin inteqrasiyası necə həyata keçirildi və hansı nəticələr əldə olundu? Bütün bunlar barədə yeni uğur hekayəmizdə ətraflı tanış ola bilərsiniz.
Tətbiqin məqsədləri: AccessBank potensial yeni Proqram təminatına hansı tələbləri qoyurdu?
Müasir maliyyə sektorunun dinamikasına uyğunlaşmaq zərurəti və gələcəkdə miqyaslanmaya fokuslanma AccessBank-ı mühasibat uçotu və inventarizasiya sahəsində yanaşmalarını yenidən nəzərdən keçirməyə sövq etdi. Mövcud modelin rəqəmsal gücləndirməyə və transformasiyaya ehtiyac duyduğu artıq aydın olmuşdur. Şirkət üçün hər zaman prioritet olan xidmətlərin sürəti və effektivliyi nəzərə alınaraq, daxili əməliyyat proseslərini avtomatlaşdıracaq müasir və rahat bir sistemin axtarılıb inteqrasiya olunmasına qərar verildi. Yeni proqram təminatı bir sıra aşağıdakı məhdudiyyətlərin aradan qaldırılmasına kömək etməli idi:
- Mühasibat uçotu və inventarizasiyanın əl ilə aparılması: bankda uçot və inventarizasiyanın bir çox mərhələsi əl ilə həyata keçirilirdi. Bu isə proseslərin ləngiməsinə, şirkətin ümumi iş səmərəliliyinin azalmasına və insan amilindən qaynaqlanan səhvlərin artma ehtimalına səbəb olurdu.
- Əsas aktivlərin uçotu üçün mərkəzləşdirilmiş sistemin olmaması: mühasibat uçotu və inventarizasiya proseslərinin bir-biri ilə əlaqələndirilməməsı zəruri məlumatlara real vaxt rejimində çıxışı çətinləşdirirdi. Bu isə nəzarətin keyfiyyətini və məlumatların şəffaflıq səviyyəsini əhəmiyyətli dərəcədə azaldırdı.
- Uzun və mürəkkəb inventarizasiya prosesi: inventarizasiya əl ilə aparıldığından, bu proses çoxlu resurs tələb edir, zaman baxımından xeyli müddət alırdı və həmişə gözlənilən nəticəni vermirdi.
Yuxarıda sadalanan bütün bu çətinliklər zaman keçdikcə bank üzərindəki inzibati və maliyyə yükünü daha da artırırdı. Buna görə də AccessBank sadəcə müasir İT avadanlıqlarını inteqrasiya etməklə kifayətlənməyib, daxili əsas biznes proseslərindən birini qlobal ən yaxşı təcrübələrə uyğun şəkildə tam transformasiya etmək qərarına gəldi. Müvafiq olaraq, potensial proqram təminatına olan tələblər dəqiq və qəti idi:
- İnteqrasiya imkanı: AccessBank üçün vacib idi ki, yeni proqram təminatı bankın mövcud İT infrastrukturuna dərindən inteqrasiya oluna bilsin. Bu, mövcud mühasibat uçotu və inventarizasiya proseslərinin pozulmaması baxımından əsas şərtlərdən biri idi.
- Arxitektura çevikliyi: yeni həll çevik olmalı idi — təkmilləşdirmələrə, miqyaslanmaya, fərdiləşdirməyə və əlavə konfiqurasiyalara imkan verməli idi ki, sistem tam şəkildə şirkətin daxili proseslərinə uyğunlaşdırıla bilsin.
- Mərkəzləşdirilmiş idarəetmə: yeni proqram təminatına olan əsas tələblərdən biri bankın bütün şəbəkəsi üzrə aktivlərin vahid sistem üzərindən mərkəzləşdirilmiş şəkildə idarə olunmasını təmin etmək idi.
- Rahat interfeys: potensial sistem bütün əməkdaşlar üçün intuitiv şəkildə başa düşülən və istifadəsi asan olmalı idi.
- Təchizatçının dəyişikliklərə hazır olması: AccessBank-ın xüsusi tələblərini nəzərə alaraq, şirkət üçün vacib idi ki, həllin tətbiqini həyata keçirən təchizatçı proqram təminatının fərdiləşdirilməsinə (kastomizasiyasına) hazır olsun.
AccessBank komandası həm yerli, həm də beynəlxalq sistemlər arasında bir çox variantı nəzərdən keçirdi. Lakin sonda SMART business təchizatçısı tərəfindən təqdim olunan Microsoft Dynamics 365 Business Central həlli seçildi. Bu seçim, funksionallıq, miqyaslana bilmək potensialı və bankın xüsusi tələblərinə uyğunlaşmağa hazır olması baxımından optimal balans təqdim etdiyi üçün üstünlük qazandı.
SMART business komandası bank sektoru üçün müasir həllərin tətbiqi sahəsində geniş təcrübəyə və çoxsaylı uğurlu layihələrə malik olaraq, AccessBank-ın daxili proseslərini dərindən anlayışla qarşıladığını və şirkətin spesifik tələblərinə uyğunlaşmağa hazır olduğunu nümayiş etdirdi. Şirkət innovativ texnologiyalar sahəsində trendləri müəyyən edən Microsoft tərəfindən təqdim olunan texniki cəhətdən yetkin və dayanıqlı bir həll təklif etdi ki, bu da son nəticədə onların təchizatçı kimi seçilməsində əsas rol oynadı.
Microsoft Dynamics 365 Business Central həllinin tətbiqi prosesi və texniki xüsusiyyətləri
Yeni sistemin tətbiqi prosesinin mümkün qədər səmərəli şəkildə həyata keçirilməsi üçün AccessBank SMART business komandası ilə birlikdə layihənin əsas nəzarət nöqtələrini müəyyənləşdirdilər: inteqrasiya məqsədlərinin dəqiq şəkildə formalaşdırılması, yekun istifadəçilərin prosesə aktiv şəkildə cəlb olunması və onların rəyinin nəzərə alınması, fərziyyələrin yoxlanılması üçün pilot layihənin hazırlanması və risklərə nəzarət məqsədilə layihə idarəetmə metodologiyasının tətbiqi.
Microsoft Dynamics 365 Business Central-in inteqrasiya prosesi cari iş axınının auditindən və “çətinliklərin” müəyyən edilməsindən başladı. Əsas inteqrasiya istiqamətləri müəyyən edildikdən sonra, SMART business mütəxəssisləri AccessBank-ın xüsusi tələblərinə uyğunlaşdırılmış həllin arxitekturasını təklif etdilər və bundan sonra mərhələli şəkildə konfiqurasiya, sınaq və sistemin mövcud proqram təminatı ilə inteqrasiyasına başladılar.
Amma istənilən irimiqyaslı İT layihəsi adətən müəyyən çağırışlarla müşayiət olunur və yeni həllin AccessBank-ın gündəlik fəaliyyətinə inteqrasiyası istisna olmadı. Məsələn, çətinlik həllin bankın mövcud daxili sistemlərinə inteqrasiyası və real vaxt rejimində məlumat mübadiləsinin qurulması oldu. Əvvəlki dövrdə şirkətin əsas aktivlərin mərkəzləşdirilmiş uçot sisteminə malik olmaması nəzərə alındıqda, bütün məlumatları konsolidasiya etmək və eyni zamanda kritik məlumatları itirmədən və əsas prosesləri dayandırmadan bunu etmək olduqca çətin bir tapşırıq idi. Lakin SMART business-in işçi qrupu ilə bankın İT departamentinin koordinasiyalı əməkdaşlığı sayəsində bu mərhələ uğurla başa çatdı və çətinlik artıq öz effektivliyini nümayiş etdirməyə başlayan bir həllə çevrildi.
Maneəsiz inventarizasiya: RFID və Microsoft ERP sistemi vasitəsilə proseslərin avtomatlaşdırılması
Bankda yenilənmiş inventarizasiya prosesi qabaqcıl texnologiyaların birləşməsinə əsaslanaraq qurulmuşdur. Bu texnologiyalara hər bir uçot obyektinə əlavə edilmiş RFID etiket sistemi daxildir. Bu metod aktivlərin əlavə barkod skan eləməyə və ya əl ilə məlumat daxil etməyə ehtiyac olmadan avtomatik şəkildə identifikasiyasına imkan verir. Eyni zamanda, RFID skaneri olan mobil cihazlar əməkdaşlara aktivləri hətta uzaq şöbələrdə belə tez bir zamanda skan etməyə kömək edir.
Bu sistemin Microsoft Dynamics 365 Business Central həlli ilə inteqrasiyası mobil cihaz ilə mühasibat uçotu bazası arasında ani məlumat mübadiləsini təmin etmişdir. Bu isə insan səhvlərinin minimuma endirildiyi maneəsiz inventarizasiya sisteminin qurulmasına imkan yaratmışdır.
Bu cür inventarizasiya sxemi çox sayda aktivi olan təşkilatlar və çoxfiliallı şirkətlər üçün olduqca uyğundur. RFID sistemi mərkəzləşdirilmiş uçot sistemi ilə birləşdirildikdə aşağıdakı üstünlükləri təqdim edir:
- Obyektlərin sürətli identifikasiyası;
- Uçot zamanı səhvlərin minimallaşdırılması;
- Şöbələrin işində fasilə vermədən inventarizasiya aparmaq imkanı;
- Bütün şirkət üzrə aktivlərin hərəkətinin şəffaflığının artırılması.
Yeni həllə uyğunlaşma: AccessBank komandası dəyişikliklərə necə reaksiya verdi
Bəzən yeni sistemin inteqrasiyası və iş proseslərinin tam transformasiyası komandanın uyğunlaşmasını tələb edir və ilkin mərhələdə bu, təbi̇i müqavimətlə müşayiət oluna bilər. Xüsusilə də əvvəlki iş axını modeli şirkətdə illərlə istifadə olunubsa. Məhz buna görə proqram təminatının yenilənməsinə komandanı düzgün şəkildə hazırlamaq son dərəcə vacibdir — bunun nə üçün edildiyini, yeni sistemin necə işləyəcəyini və ondan necə istifadə olunacağını izah etmək lazımdır. AccessBank komandası bu vəzifənin öhdəsindən maksimum dərəcədə peşəkarlıqla gəldi.
Bank əməkdaşları layihənin həyata keçirilməsinin ilk günlərindən etibarən ona maraq göstərdilər, çünki bu prosesin gündəlik işin optimallaşdırılması baxımından nə qədər vacib olduğunu anlayırdılar. Birbaşa inteqrasiya zamanı bankın komandası SMART business mütəxəssisləri ilə birlikdə əməkdaşların ətraflı şəkildə təliminə, sənədləşmənin formalaşdırılmasına və istifadəçi təlimatlarının hazırlanmasına xüsusi diqqət yetirdi.
Yeni həllə uyğunlaşmanın mümkün qədər asan keçməsi üçün sistemin tətbiqi mərhələli şəkildə həyata keçirildi: pilot versiyadan genişmiqyaslı yerləşdirməyə qədər, hər mərhələdə alınan rəylərə əsasən düzəlişlər etmə imkanı ilə. Nəticədə, AccessBank əməkdaşları rahat, funksional və asan başa düşülən bir alət əldə etdilər. Tətbiqin son məqsədi — şirkətin gündəlik iş fəaliyyətində sistemin yüksək səviyyədə mənimsənilməsini təmin etmək — uğurla reallaşdı.
Microsoft Dynamics 365 Business Central həllinin tətbiqinin nəticələri: hansı məqsədlərə nail olundu və bankda mühasibat uçotu və inventarizasiya prosesləri necə dəyişdi
AccessBank komandası qeyd etdiyi kimi, hazırkı mərhələdə Microsoft Dynamics 365 Business Central sisteminin tətbiqi üzrə bütün əsas məqsədlərə uğurla nail olunmuşdur. Layihənin nəticələri demək olar ki, dərhal hiss olunmağa başladı:
- Əsas aktivlərin inventarizasiyası artıq çətin və resurs tələb edən bir proses deyil — əvvəllər əl ilə yerinə yetirilən bir çox əməliyyat tam avtomatlaşdırılıb. Inventarizasiya prosesi maksimum dərəcədə şəffaf, strukturlaşdırılmış və sürətli olub.
- Şirkətin bütün məlumatları vahid mərkəzləşdirilmiş sistemdə saxlanılır, bu da əməkdaşlara vacib informasiyaya real vaxt rejimində çıxış imkanı yaradır. Nəticədə, kritik məlumatların itirilməsi və ya məlumatların təkrarlanması riski əhəmiyyətli dərəcədə azalıb.
- Rahat interfeys və vahid sistem sayəsində bank əməkdaşları aktivlərlə həm ofisdə, həm də ofisdən kənar şəraitdə işləyə bilirlər. Bu isə öz növbəsində komandanın cəlb olunmasını və məmnunluq səviyyəsini artırıb.
- Aktivlərin faktiki mövcudluğunu uçot məlumatları ilə tez sinxronlaşdırmaq imkanı sayəsində məlumat uyğunsuzluğu minimuma endirilib.
Microsoft Dynamics 365 Business Central sisteminin tətbiqi bank üzərindəki inzibati yükü əhəmiyyətli dərəcədə azaltdı və resursların daha prioritet tapşırıqlara yönləndirilməsinə imkan yaratdı. Öz növbəsində, əsas vəsaitlərin uçotu proseslərinin avtomatlaşdırılması birbaşa olaraq biznes proseslərin səmərəliliyinə təsir göstərdi: əməkdaşların iş yükü azaldı, məlumatların etibarlılığı yüksəldi, idarəetmə qərarlarının qəbulu daha sürətli və səmərəli oldu.
Bütün bu nailiyyətlər bankın rəqəmsal transformasiyaya sistemli və şüurlu yanaşmasının nəticəsidir. Əminliklə demək olar ki, proseslərin rəqəmsallaşdırılması layihəsi təkcə mühasibat uçotuna deyil, həm də daxili idarəetmənin keyfiyyətinə təsir göstərmiş, strateji planlaşdırmanı gücləndirmiş və AccessBank-ın inkişafı üçün yeni imkanlar açmışdır.
Lakin şirkət bununla kifayətlənmək niyyətində deyil. Bank dinamik şəkildə inkişaf edir, daxili proseslər transformasiya olunur, təşkilatın İT strategiyası müasir bazar standartlarına uyğunlaşdırılır. AccessBank bildirir ki, SMART business şirkətini uzunmüddətli tərəfdaş kimi görür və gələcəkdə proseslərinin avtomatlaşdırılması üzrə yeni istiqamətlər üzərində işləməyi planlaşdırır.
AccessBank-ın gələcək planları və digər şirkətlərə tövsiyələri
Yaxın gələcəkdə AccessBank Microsoft Dynamics 365 Business Central sistemindən istifadəni davam etdirməyi planlaşdırır, çünki bu həll onların mühasibat uçotu və inventarizasiya proseslərinin avtomatlaşdırılması üzrə əsas ehtiyaclarını tam şəkildə qarşıladı. Bununla belə, müasir bazar inkişaf tempini özü diktə edir və təkmilləşmə üçün həmişə yeni imkanlar mövcuddur. Buna görə də, şirkət iş proseslərinin rəqəmsallaşdırılmasını davam etdirməyi, nəticədə müştərilər və əməkdaşlar üçün maksimal dərəcədə müsbət təcrübə yaratmağı qarşısına məqsəd qoyur. Əməkdaşlığın uğurlu təcrübəsini nəzərə alaraq, bank gələcək layihələrin həyata keçirilməsində də SMART business komandasını cəlb etməyi planlaşdırır.
AccessBank həmkar şirkətlərə rəqəmsal transformasiyanı “uyğun vaxtı” gözləmədən həyata keçirməyi tövsiyə edir. Yeni proqram təminatının tətbiqindən maksimum nəticə əldə etmək üçün, bank öz praktiki təcrübəsinə əsaslanaraq bir neçə vacib amili müəyyən etmişdir:
- Layihənin məqsədlərini dəqiq şəkildə müəyyənləşdirmək və onları bütün maraqlı tərəflərlə razılaşdırmaq.
- Real təcrübəyə malik olmalarını təmin etmək üçün əsas istifadəçiləri əvvəlcədən prosesə cəlb etmək.
- Cari İT mühitinə asanlıqla uyğunlaşan və inteqrasiya olunan həlləri seçmək.
- Yalnız məhsula deyil, həm də təchizatçı komandanın peşəkarlığına və əməkdaşlıq səviyyəsinə diqqət yetirmək, çünki tərəfdaşın təcrübəsi və iştirakı layihənin uğurunda mühüm rol oynayır.
Ən yaxşı tətbiq nəticələrinə tərəfdaşın biznes prosesləri üzrə təcrübəsi, sistem haqqında dərin bilikləri və dəqiq metodologiyası ilə bir tərəfdən, müştərinin dəyişikliklərə marağı, sistemli yanaşması və yenilikləri qəbul etməkdə çevikliyi ilə digər tərəfdən sinerji yaradılarsa nail olmaq mümkündür. Bu halda birgə komanda qeyri-real gözləntilər və məsuliyyətin ötürülməsi olmadan əlaqələndirilmiş bir mexanizm kimi işləyir. AccessBank komandası yüksək motivasiyası və peşəkarlığı sayəsində layihənin məqsədlərinə çatmaqda mühüm rol oynadı.
